Лениногорскиның картлар һәм инвалидлар интернат-йортында Ваһаповлар гаиләсе теркәлде
Лениногорскиның картлар һәм инвалидлар интернат-йортында Рәмис Ваһапов белән Мария Шәйдуллина мөнәсәбәтләрен рәсмиләштерде. Бу хакта «Заман сулышы» хәбәр итә.
Интернат-йортның өч катта урнашкан бүлмәләрендә сиксәнләп кеше яши. Әлбәттә, һәркемнең үз аралашу төркеме бар. Тирә-күршеләр, бер үк катта яшәүчеләр бер-берсен якынрак белә. Шул очраклы әңгәмәгә кадәр бер-берсе белән ачылып аралашмаган Мария һәм Рәмис дуслашып китәләр.
«Мариянең гади бер әсәрдәге герой турында еларга җитешеп сөйләве, минем өчен көтелмәгәнчә булды. Китап укып елый алганнарның күңелендә каралык булмый диләр бит. Интернат йортта икебез дә биш еллап яшәсәк тә, якыннан аралашканыбыз булмады. Мин үзем безнең йортта булган барлык бәйрәмнәрдә катнашам. Артистлар килсә, алар җырлаган көйгә дә биеп китмичә түзә алмыйм. Мария аларның чыгышларын тыйнак, оялчан гына тыңлап утырган. Шуңа күрә бер-беребезне белешмәгәнбез инде»,- ди Рәмис Ваһапов.
Лениногорск картлар һәм инвалидлар интернат- йортына алар икесе ике төрле, әмма бик ачы язмыш сынаулары үтеп килгәннәр.