Федерация Советы дәүләткә хыянәт иткән өчен гомерлеккә иректән мәхрүм итү законын хуплады
Федерация Советы дәүләткә хыянәт иткән өчен гомерлеккә иректән мәхрүм итү турындагы закон проектын хуплады. Моннан тыш, Россия катнашмаган халыкара оешмаларның карарларын үтәүгә ярдәм иткән өчен җәза кертелә. Бу маддә буенча хокук бозучыларга 5 елга кадәр ирегеннән мәхрүм ителү яный. РИА Новости шул хакта хәбәр итә.
«Россия Федерациясе Җинаять кодексының «Гомерлеккә иректән мәхрүм итү» турындагы 57 маддәсе тулыландырыла, анда конституцион төзелеш һәм дәүләт иминлеге нигезләренә каршы аеруча авыр җинаять кылу, андый очракта гомерлек иректән мәхрүм итү рәвешендә җәза билгеләнергә мөмкин», диелә документта.
Шулай ук мөлкәтне конфискацияләү каралган җинаятьләр исемлеге киңәйтелгән. Хәзер исемлеккә диверсион эшчәнлеккә ярдәм итү, аны үткәрүгә өйрәтү, диверсион берләшмәләр һәм оешмалар булдыру кертелгән.
Терактлар өчен 20 елга кадәр, террорчылык җәмгыяте оештырган өчен 10 елдан 15 елга кадәр иректән мәхрүм итү каралган.