Лаеш Җәмигъ мәчетендә мохтаҗларның ихтыяҗы язылган конвертны алып, ярдәм итәргә була
Лаеш шәһәренең Җәмигъ мәчетендә Рамазан аенда мохтаҗларга ярдәм итүнең яңа форматын уйлап тапканнар. Проектны Җәмигъ мәчетенең имам-хатыйбы Зөфәр хәзрәт Габдуллин һәм мәчет активистлары оештырган.
Мәчеткә керә торган урында «Рамазан – изге гамәлләр ае» дигән стендка конвертлар беркетеп куелган - аларның эчендә мохтаҗ кешеләрнең, ятим балаларның, инвалидларның, төрле авыр хәлдә калган дин кардәшләребезнең ихтыяҗлары турында язылган. Бу турыда Татарстан Диния нәзарәте хәбәр итте.
Теләгән һәркем, конвертны ачып, аларга ярдәмен күрсәтә ала. Стендтагы конвертларда Лаеш шәһәрендә һәм шулай ук янындагы авылларда яшәүче 30лап гаиләнең ихтыяҗлары язылган. Алар арасында тол һәм ялгыз әниләр, инвалидлар һәм инвалид балаларны тәрбияләүчеләр, ятимнәр, күпбалалы гаиләдән чыккан балалар һ.б. бар.
Проектны Җәмигъ мәчетенә йөрүчеләр бик хуплап каршы алган. Стендка урнаштырылган конвертлар саны кими бара, ярдәмгә мохтаҗлар турында яңа мәгълүматлар өстәлә. Булышлык итүчеләр арасында үзләре турында мәгълүмат бирмәүне сораучылар да, мохтаҗлар белән очрашып күрешүчеләр дә бар. Беренче очракта акчаларны, азык-төлек җыелмаларын мәчет активистлары җыеп тапшыра. Рамазан аенда бу кешеләргә ярдәм итеп бетерергә ниятлиләр, диелә хәбәрдә.