Путин Раштуа белән котлады, махсус операциядә катнашучыларга ярдәм өчен рәхмәт әйтте
Россия Президенты Владимир Путин илнең православие халкына Раштуа котлавы белән мөрәҗәгать итте. Бу якты бәйрәм кешеләрне изге эшләргә һәм омтылышларга рухландыра, җәмгыятьтә шәфкать, мәрхәмәт, изгелек һәм гаделлек кебек сыйфатларны раслауга хезмәт итә, диелгән Кремль сайтында чыккан котлауда.
Рус православие чиркәве һәм башка христиан конфессияләре җәмгыятьне берләштерүгә, безнең тарихи истәлекләрне саклауга, яшьләрне тәрбияләүгә, гаилә институтын ныгытуга зур өлеш кертә, диде Путин.
«Чиркәү оешмалары безнең илдә милләтара һәм динара тынычлык һәм татулыкка ярдәм итүгә зур игътибар бирә, ярдәмгә мохтаҗлар турында кайгырта, махсус хәрби операциядә катнашучыларны хуплый. Шундый зур, күпкырлы, чын мәгънәсендә зур эш ихлас ихтирамга лаек», диелә дәүләт башлыгы котлавында. Президент бәйрәмне билгеләп үтүчеләрнең барысына да сәламәтлек һәм уңышлар теләде.