Тверь өлкәсендә җанисәпкә кадәр һәр райондагы татарларның санын ачыкларга ниятлиләр
(Казан, 10 март, «Татар-информ», Гадел Әхмәтҗанов). Тверь өлкәсендә быел узачак җанисәпкә кадәр һәр райондагы татарларның санын ачыкларга җыеналар. «Җанисәп алдыннан бөтен Тверь өлкәсен йөреп чыгарга ният бар. Хәзер кайда, күпме татар яшәгәнен белешеп район администрацияләренә хатлар язабыз. Аннан соң райондагы һәр татар белән очрашачакбыз. Алар белән күрешеп, аралашырга, „Татарлар: гамәл стратегиясе“ белән таныштырырга телибез», — диде Тверь өлкәсе татар милли-мәдәни автономиясе рәисе Марс Ибраһимов «Татар-информ» хәбәрчесенә. Аның сүзләренчә, очрашуларда концертлар кую да каралган. «Үзебезнең кечкенә генә җыр һәм бию ансамблебез бар. Ул ансамбльгә хәзер яшьләр килергә җыена. Бөтен өлкәдә алар белән концертлар да куярга уйлыйбыз», — диде Марс Ибраһимов. Очрашулар агымдагы елның апрель–май аенда башланыр һәм сентябрьгә кадәр дәвам итәр дип ниятләнә.