Фәрит Мөхәммәтшин Туган телләр елына багышланган картиналар күргәзмәсен карады
(Казан, 29 гыйнвар, «Татар-информ», Гөлнар Гарифуллина). Татарстан Дәүләт Советы Рәисе, Татарстан халыклары ассамблеясе рәисе Фәрит Мөхәммәтшин Туган телләр һәм халыклар бердәмлеге елына багышланган «Лики России» картиналар күргәзмәсен карады. Татарстан халыкларының Дуслык йортында оештырылган күргәзмәне РФ Иҗтимагый палатасының Милләтара һәм диннәр арасындагы мөнәсәбәтләрне җайга салу буенча комиссия рәисе Владимир Зорин әзерләгән.
Картиналар аның гаилә коллекциясеннән. Ул Россиянең барлык төбәкләреннән җыелган. Зорин 250 ләп авторның 450 дән артык картинасын туплаган. Аларның 42се бүгенге күргәзмәдә. Бу XX гасырның соңгы чиреге — XXI гасыр баш рәссамнарының пейзажлары. Күргәзмә 21 мартка кадәр эшләячәк. «Без караган күргәзмә бик эчтәлекле. Бу республика гына түгел, Россия Федерациясенең күпкырлы тормышын күрсәтә. Күп милләтле халыкның рухи берлегенә өлеш кертә», — дип бәяләде Фәрит Мөхәммәтшин. Ул бу Туган телләр елында халыклар арасындагы дуслык, татулыкны күрсәтүгә зур игътибар биреләчәген билгеләп узды. Күргәзмәнең биредә ачылуы да очраклы булмавын әйтте. «Бу күргәзмәне башка төбәкләр дә күреп, рәссамнарыбызның иҗат җимешләре белән хозурланып йөрүен бик теләр идек», — диде Фәрит Мөхәммәтшин.
«Коллекциядәге картиналар арасыннан иң-иңнәрен сайлап алу җиңел булмады. Исем-фамилиясен дә, адресын да карамадык, бары тик сурәтенә генә карап сайладык. Өчесе Татарстан рәссамнарыныкы булды», — диде Владимир Зорин. Ул бу күргәзмәне оештыру идеясе күптән туганын, быел Туган телләр елында аны тормышка ашыру өчен иң кулай вакыт дип табылганын билгеләп узды. «Безнең идея халыклар дуслыгы, бердәмлеге һәм үзара аңлашуны, милләтара татулыкны ныгытуга җирлек булуына шатбыз», — диде Зорин.
«Татарстанда бик мөһим ел игълан ителгән, чөнки туган телләр — кешенең культурасы, аерым милләт вәкиле булуының мөһим факторы. Халыклар бердәмлегендә сынлы сәнгатьнең дә роле зур», — дип белдерде РФ Иҗтимагый палатасының комиссия рәисе. Күргәзмә ачылышында Фәрит Мөхәммәтшин Владимир Зоринга ТР Дәүләт Советының Рәхмәт хатын тапшырды.