Татарстанда җылылык өчен түләү декабрьдә аномаль салкын булу сәбәпле арткан
(Казан, 29 гыйнвар, «Татар-информ»). Татарстанда ягып җылыту бәясе тарифларны арттыру сәбәпле түгел, ә декабрьдә аномаль салкын булганга арткан. «Татар-информ» агентлыгында торак биналарны җылытуга бәйле торак-коммуналь хезмәт күрсәтү мәсьәләләре буенча матбугат конференциясендә шул хакта әйттеләр. «Без тарифлар үзгәрешен түгел, ә түләү мәсьәләсен карыйбыз. Тарифлар агымдагы елның икенче яртысында көйләнә һәм үзгәрә. Шулай ук тарифлар соңгы биш ел дәвамында көйләнә. Түләүләр 2021 елның 1 июленнән артачак. 1 гыйнварда тарифлар үзгәрми. Түләүләр куллану күләменнән чыгып кына үзгәрә», — диде Татарстан төзелеш, архитектура һәм торак-коммуналь хуҗалык министрының беренче урынбасары Алексей Фролов. Ведомство мөрәҗәгатьләрне эшкәрткән һәм республиканың зур шәһәрләрендә җылылык белән тәэмин итүә торган компанияләр белән ачыклаганнар. Белгечләр хисап приборлары һәм һава торышына карап көйләү төеннәре эшенә анализ ясаган. «Узган елның декабре 2019 елның декабреннән салкынрак булу сәбәпле, яңа ел каникулларыннан соң гражданнарда сорау туды. Декабрьдә җылылык энергиясен куллану күләме 2019 елның декабрь һәм ноябрь айларына караганда югарырак булды», — диде спикер. Гражданнар мөрәҗәгатьләре белән бәйле рәвештә, министрлык халыкка энергияне саклау мәсьәләсе буенча аңлату эшләре алып бару бурычын куйды. «Җылыту батареясының температурасы нинди булырга тиеш, җылылык бирү ничек көйләнергә тиеш һәм бу мәсьәлә буенча кая мөрәҗәгать итәргә», — диде министр урынбасары. 2021 елның гыйнварында Төзелеш, архитектура һәм торак-коммуналь хуҗалык министрлыгына ягып җылыту буенча 9 сорау килгән. Шулай ук ведомствоның бердәм хисап үзәгенең кайнар элемтәсенә 1,3 мең шалтырату ясалган. Барлык мөрәҗәгатьләрнең 15 проценты ягып җылыту өчен түләүләргә бәйле булган.