2020 елда мәдәният тармагындагы бер генә хезмәткәр дә социаль зыян күрмәгән
(Казан, 22 гыйнвар, «Татар-информ», Рузилә Мөхәммәтова). Объектив икътисади кыенлыклар булуга карамастан, 2020 елда мәдәният тармагындагы бер генә хезмәткәр дә социаль зыян күрмәгән.
«Без хәтта уртача хезмәт хакының фаразланган айлык керемнәрдән якынча 4 процентка артуына да ирештек», — диде ТР мәдәният министры Ирада Әюпова министрлыкның йомгаклау коллегиясе утырышында.
Ирада Әюпова авыл җирендә эшләүче мәдәният хезмәткәрләренең индивидуаль төзелеш өчен җир кишәрлеген ташлама белән алу мөмкинлеген искәртеп үтте. Бу эштә ярдәм иткән өчен ТР Дәүләт Советы Рәисе Фәрит Мөхәммәтшинга рәхмәтләрен җиткерде.
Бүген Чаллы Татар дәүләт драма театрында ТР мәдәният министрлыгының йомгаклау коллегия утырышы узды. Коллегия утырышында ТР Дәүләт Советы Рәисе Фәрит Мөхәммәтшин катнашты.