Әгерҗедә транспорт-логистика һәм индустриаль парк төзергә планлаштыралар
(Әгерҗе, 8 гыйнвар, «Татар-информ», «Әгерҗе хәбәрләре» ). Бүген Әгерҗе районына эшлекле визит белән Татарстан транспорт һәм юл хуҗалыгы министры Фәрит Хәнифов килде. Очрашу барышында Әгерҗедә транспорт-логистика һәм индустриаль парк төзү планнары турында да сүз барды. Бу турыда район басмасы хәбәр итә. Фәрит Мөдәрис улы Әгерҗе районы башлыгы Азат Вәлиев һәм Горький тимер юлы башлыгының территориаль идарә буенча урынбасары Александр Лапшин белән берлектә Әгерҗе станциясенең эксплуатация локомотив депосында һәм сортировкалау тавында булдылар.