Әлмәттә һәм Лениногорскида авылда эшкә урнашу һәм бизнес ачу турында сөйләячәкләр
(Казан, 9 ноябрь, «Татар-информ»). Бу көздә ай дәвамында Татарстан Аграр яшьләр берләшмәсе һәм республика Авыл хуҗалыгы һәм азык-төлек министрлыгы идарәсе вәкилләре Бөтенроссия яшьләр проекты кысаларында республиканың өч районында булды һәм агробизнес мөмкинлекләре турында сөйләделәр. Чираттагы күчмә чара 11 ноябрьдә Әлмәт һәм Лениногорск районнарында узачак. Бу турыда министрлык матбугат хезмәте хәбәр итә. Очрашулар авылның мәдәни-тарихи мирасын саклап калу һәм авыл территорияләрендә «Авылда эшлә — кыю бул» юнәлешендә үзеңне күрсәтү мөмкинлекләре турында халыкка мәгълүмат җиткерүне арттыру максатыннан үткәрелә. Эшче төркем Арча, Кукмара һәм Кама Тамагы районнарында булды. Аларда төрле яшьтәге төркемнәр вәкилләре — мәктәп укучыларыннан һәм техникум укучыларыннан алып агробизнес белән шөгыльләнүче тәҗрибәле белгечләр һәм максатчан авыл хезмәтчәннәре белән очраштылар. Барлыгы 150дән артык кеше авыл халкы өчен грантлар һәм субсидияләр турында тулы мәгълүмат алды. Барлык районнарда да сораулар бирделәр, чөнки һәр фермер үз эшенә финанс ярдәме алырга тели. Эш барышында авыл территорияләрендә эшкә урнашуда һәм практика (стажировка) узуда кызыксынучы һөнәри белем бирү оешмаларын һәм югары белем бирү оешмаларын тәмамлаучылар/чыгарылыш сыйныф укучылары реестрын формалаштыру һәм анкеталаштыру алып барылачак. Бу мәсьәләдә проектта катнашучыларны Казан дәүләт аграр университеты һәм Н.Э.Бауман исемендәге Казан дәүләт ветеринария медицинасы академиясе укытучылары координацияли.