Мөслимдә өлкәннәр арасында йөзү ярышында җиңүчеләр билгеле
(Казан, 6 ноябрь, «Татар-информ», « Мөслим-информ »). Мөслимдә «Тамчы» йөзү бассейнында «Өченче буын» дүртенче республика ярышларының муниципаль туры узды. Өлкәннәр йөзү ярышларында көч сынашты. Бу хакта район басмасы хәбәр итә.
Ир-атлар арасында беренче урынны Яңа Усы авылыннан Валерий Кондратьев, икенче урынны Мөслимнән Таһир Шәйхразиев, өченче урынны Мәлләтамактан Равил Сәхбиев яулады.
Хатын-кызлар арасында Вәрәшбаш авыл җирлегеннән Рәйсә Хаметовага тиңнәр булмады. Икенче урында Мәлләтамактан Галия Вагыйзова, өчтә — Олы Чакмактан Сирена Фәсхиева.
Ир-атлар һәм хатын-кызлар арасында беренче урын яулаучылар 11 ноябрь көнне Казан шәһәрендә Мөслим данын яклаячак, диелә бу хәбәрдә.