Түбән Кама даруханәләренә коронавирустан дару кайтарылган
(Казан, 8 октябрь, «Татар-информ»). Түбән Камадагы бер даруханәгә яңа коронавирус инфекциясеннән «Коронавир» дип аталган дару кайтарылган. Бу хакта «НТР 24» хәбәр итә. Бер капта 50 дару, бәясе — 11,5 мең. Препаратны җитештерүче «Р-фарм» компаниясенең рәсми сайтында язылганча, «Коронавир» җиңел һәм уртача катлаулы формадагы Covid-19 коронавирус инфекциясен дәвалау өчен кулланыла. Препаратның патентланмаган халыкара атамасы «Фавипиравир». Даруханәдә препаратларның бары тик табиб рецепты буенча гына бирелүен әйттеләр. Россиядә теркәлгән тагын бер дару — «Арепливир», 003rt.ru дарулар белешмәлеге мәгълүматларына караганда, Түбән Камада бу препарат әлегә сатуда юк. Хәзерге вакытта Россиядә 500 каптан артык «Арепливир» һәм «Коронавир» сатылган. Октябрь ахырында «Авифавир» дигән тагын бер дару сатуга чыгачак.