Грција го советува Хафтар да биде конструктивен во Берлин

Грција го охрабрила либискиот генерал Калифа Хафтар да биде конструктивен на престојната конференција во Берлин на која треба да се направи обид за завршувањето на војната во Либија, рече грчкиот министер за надворешни работи Никос Дендиас.

Хафтар во Атина пристигна вчера, а покрај со Дендиас денеска се среќава со грчкиот премиер Кирјакос Мицотакис. Дендиас рече и дека Атина требала да учествува на конференција за Либија што ќе се одржи во Берлин во недела. На неа ќе присуствуваат лидерите од Турција, Русија, САД, Британија, Кина, Франција и Италија.

Минатата недела Хафтар и Фајез ал-Сараџ, кој е на чело на либиската влада која е признаена од Обединетите нации се сретнаа во Москва со посредство на турски и руски претставници во обид да постигнат договор за прекин на огнот. Хафтар не го потпиша договорот, а претседателот на Турција Реџеп Таип Ердоган рече дека Турција ќе му „одржи лекција“ доколку ги продолжи нападите во Триполи врз силите на Сараџ. 

Инаку, Либија е зафатена од насилства по падот на Моамер Гадафи кој беше соборен од власт и убиен во 2011 година. Земјата сега има две влади, едната поддржана од Обединетите нации и се наоѓа во Триполи, а другата е владата на Либиската национална армија предводена од Хафтар.