Украинскиот премиер Хончарук си поднесе оставка

Украинскиот премиер Олексиј Хончарук си поднесе оставка поради скандалот со аудио снимката во која тој наводно ги потценува неговите и на претседателот Володимир Зеленски економски знаења и способности.

Во денешната објава на социјалната мрежа Фејсбук Хончарук напиша дека во последните денови сите биле сведоци на случувањата поврзани со аудио снимките кои биле монтирани од делови од снимки од владини состаноци.

Канцеларијата на Зеленски потврди дека го добила писмото со оставка од Хончарук, но наведе дека подоцна ќе коментираат како ќе постапат во ситуацијата. Засега нема потврда на вистинитоста на снимката. Во објавениот извадок се слуша глас како на Хончарук како вели дека тој и Зеленски не се компетентни за економски прашања.