Ирандагы демонстрациялар учурунда британ элчиси кармалып, кое берилди

Улуу Британиянын Тегерандагы элчиси Роб Макэйр Иран бийлиги тарабынан ишемби күнү кармалып, кайра коё берилгенин айтып чыкты. Ал учак кырсыгынын курмандыктарын эскериш үчүн барган учурда кармалган.

Ирандагы «Mehr» маалымат агенттиги жазганы боюнча, британ элчиси Тегерандагы Амир Кабир университетинин алдындагы митинг учурунда «чагымчыл аракеттерге тиешеси бар» деген шек менен кармалган.

Элчи Макэйр «Твиттердеги» баракчасына эч кандай демонстрацияга катышпагынын, ал жерге учак курмандыктарын эскериш үчүн барганын жазып чыкты.

Ал эми Британиянын Тышкы иштер министрлиги элчисинин кармалышын «эл аралык укукту одоно түрдө бузуу» катары баалады.

11-январда Тегерандагы Технологиялык университеттин алдына чогулгандар Ирандын бийлигине, анын руханий лидери Али Хаменеиге каршы ураандарды кыйкырышты. Мындай нааразылык акциясы расмий Тегеран өз аймагында кулаган учакты капысынан атып түшүргөнүн билдирген соң болуп өттү.

Алгач Ирандын бийлиги бортунда 176 киши бар украиналык «Боингдин» кулашын техникалык мүчүлүштүктөр менен түшүндүрүп жаткан.

Бирок 11-январда Тегеран учакты «адамдын жаңылыштыгынан» улам өлкөдөгү Ислам революциясынын сакчылар корпусунун аскерлери атып алганын моюнга алды.

«Украинанын эл аралык аба жолдору» компаниясына таандык учак 8-январда таңга маал Ирандын борбору Тегерандан Киевди көздөй учуп чыгары менен эле кырсыкка кабылган. Бул кырсыктан каза болгон 176 адамдын көпчүлүгү Ирандын атуулдары жана Канада жарандыгын алган ирандык болчу.