Индиянын баш калаасы Нью-Делидеги мейманканада өрт чыгып, андан кеминде 17 киши каза тапты. Шаардык полициянын басма сөз кызматы билдиргендей, "Arpit Palace" отелинде шейшембинин таңында тутанган өрттөн дагы төрт адам жараат алды. Нью-Делинин батыш тарабында жайгашкан бул имараттан 35 киши аман-эсен куткарылды. Тилсиз жоо каптаганда мейманканадагылардын көбү уктап жатканын жергиликтүү маалымат каражаттары кабарлашты. Азырынча кырсыкка эмне себеп болгону аныктала элек.
Индияда турак жайларда коопсуздук эрежелери сакталбагандыктан жана жеткиликтүү текшерүү жүргүзүлбөгөндүктөн буга чейин да ири өрт кырсыктары катталган.
2016-жылы Керала штатында храмда чыккан өрттөн 100дөн ашык кишинин өмүрү кыйылып, 200дөй адам жараат алган. Пиротехника сакталган кампадагы жарылуудан тутанган жалын храмды толугу менен жок кылган.