Путин менен Эрдоган Москвада жолугушту
23-январда Орусия президенти Владимир Путин менен Түркия президенти Режеп Тайып Эрдоган Москвада жолугушту. Негизги тема катары Сириядагы жаңжалды жөнгө салуу маселесин талкуулашты.
Лидерлер АКШнын Сириядан аскерлерин чыгарып кетүү боюнча билдирүүсүнө токтолушту. Путин мындай чечимди кубаттай турганын маалымдады.
Өз кезегинде Түркия президенти террористтик топтор аймактан АКШ аскерлери чыгып кеткен жагдайдан пайдалануу ыктымалдыгына тынчсыздануусун билдирди. Мындай кырдаалды алдын алуу үчүн коопсуздук жаатында кызматташуунун улантууну макулдашып, эки президент Сириядагы жаңжалды жөнгө салууга күч жумшай тургандыгын белгилешти.
Эрдоган Сирия-Түркия чек арасына жакын тилкеге орус аскерлери менен бирге буфердик аймак түзүүнү сунуштады.
Сирияда жарандык согуш башталганына мартта сегиз жыл толот. Орусия жана Иран куралдуу жаңжалда президент Башар Асадды колдосо, АКШ менен Түркия өкмөткө каршы күрөшкөн козголоңчулардын таламын талашып келатышат.
Бирок АКШ президенти Дональд Трамп Сириядан 2000 аскерин чыгарып кетерин күтүүсүздөн жарыялаган соң Орусия менен Түркия согуш болуп жаткан аймактарда аскердик операцияларын координациялоону макулдашкан.
Сириянын түндүгү менен түндүк-чыгышында АКШнын эки миңден ашуун аскери жайгаштырылган. Алар "Ислам мамлекети" террордук тобуна каршы күрөштө жергиликтүү күрт жана араб кошуундарынан турган Сирия демократиялык күчтөрүнө колдоо көрсөтүп келген.