ერევანი აცხადებს, რომ მიღწეულია სომხეთ-აზერბაიჯანის საზღვარზე ცეცხლის შეწყვეტის შეთანხმება
სომხეთის თავდაცვის სამინისტროს ინფორმაციით, 14 სექტემბრის 20:00 საათიდან საბრძოლო მოქმედებები პრაქტიკულად, შეწყდა ყველა მიმართულებით. სამინისტროს პრესმდივანმა არამ ტოროსიანმა სიცრუე უწოდა გავრცელებულ ცნობებს, რომ სომხეთის ზოგიერთი დასახლებული პუნქტი აზერბაიჯანის კონტროლქვეშ მოექცა.
14 სექტემბერს, ღამით ერევანში საპროტესტო აქცია დაიწყო მას შემდეგ, რაც გავრცელდა ცნობები აზერბაიჯანთან სომხეთის ინტერესთა საზიანო შეთანხმების ხელმოწერის შესახებ. პარლამენტთან შეკრებილებმა მოითხოვეს პრემიერ-მინისტრ ნიკოლ ფაშინიანის გადადგომა.
14 სექტემბერს, დღისით, პარლამენტში გამოსვლისას ფაშინიანმა განაცხადა, რომ მისი პასუხისმგებლობაა მშვიდობის დასამყარებლად რთული გადაწყვეტილებების მიღება, რაც არ ნიშნავს სომხეთის ინტერესთა საწინააღმდეგო გადაწყვეტილებებს. ფაშინიანის თქმით, სურთ ხელი მოაწერონ დოკუმენტს, რომლის გამოც შესაძლოა, ბევრმა გააკრიტიკოს, მოღალატე უწოდოს და ხელისუფლებიდან მათი ჩამოშორება გადაწყვიტოს, მაგრამ მადლობელი იქნებიან, თუ ამის შედეგად სომხეთის რესპუბლიკა მიიღებს მყარ მშვიდობას და უსაფრთხოებას 29.8 ათას კვადრატულ კილომეტრზე.
მოგვიანებით ფაშინიანმა ფეისბუკის ოფიციალურ გვერდზე დაწერა, რომ არანაირი დოკუმენტი ხელმოწერილი არ არის და არც მზადდება. სომხეთის პარლამენტის სპიკერის, ალენ სიმონიანის თანახმად, საკანონმდებლო ორგანოში პრემიერ-მინისტრის გამოსვლა ეხებოდა იმას, რომ არავინ არაფრის დათმობას არ აპირებს. „29.8 ათასი ეს სომხეთის მთელი ტერიტორიაა... საუბარი არ იყო არც არცახზე(მთიანი ყარაბაღი), არც სომხეთის რესპუბლიკაზე. სომხეთის ტერიტორია ჩვენთვის წითელი ხაზია“, - თქვა სიმონიანმა.
სომხეთ-აზერბაიჯანის საზღვარზე საბრძოლო მოქმედებები 13 სექტემბერს განახლდა, რაშიც მხარეებმა ბრალი ერთმანეთს დასდეს. აზერბაიჯანის თავდაცვის სამინისტროს ინფორმაციით, დაიღუპა 50 სამხედრო. პრემიერ-მინისტრ ფაშინიანის ცნობით, დაიღუპა სომხეთის არმიის 105 სამხედრო მოსამსახურე.
2020 წლის ნოემბერში, ე.წ. 44-დღიანი ომის შემდეგ, სომხეთი და აზერბაიჯანი რუსეთის შუამავლობით შეთანხმდნენ საომარი მოქმედებების შეწყვეტაზე. ამ შეთანხმებით, აზერბაიჯანმა დაიბრუნა ყარაბაღის რამდენიმე რაიონზე 90-იან წლებში დაკარგული კონტროლი. რეგიონში განთავსდა რუსეთის "სამშვიდობო კონტინგენტი". კონფლიქტის ზონაში სიტუაცია დაიძაბა 2022 წლის აგვისტოშიც.