ირანის ავიაკომპანიის თვითმფრინავს ცეცხლი წაეკიდა თეირანის აეროპორტში დაშვებისას
თეირანის მეჰრაბადის აეროპორტში დაშვებისას, ცეცხლი წაეკიდა ავიალაინერს, მაგრამ 100-ვე მგზავრი უვნებლად იქნა ევაკუირებული. ამის შესახებ აცხადებენ ირანელი ოფიციალური პირები.
საგანგებო მდგომარეობათა დეპარტამენტის ხელმძღვანელმა, ფირჰოსეინ კოლივანდმა სახელმწიფო ტელევიზიაში განმარტა, რომ თვითმფრინავში ცეცხლი გაჩნდა 19 მარტის საღამოს, როცა სწორად არ გაიხსნა შასი (თვითმფრინავის ნაწილი, რომლითაც იგი მოძრაობს აეროდრომზე აფრენის ან დაჯდომის დროს).
ცნობების თანახმად, პრობლემა შეექმნა „ფოკერ 100“ ტიპის თვითმფრინავს, ის ავიაკომპანია „ირან ეარს“ ეკუთვნის.
რამდენიმე ათწლეულის საერთაშორისო სანქციების ფონზე, ირანის სამგზავრო თვითმფრინავები მოძველებულია და ბოლო წლებში გახშირდა ხარვეზები საჰაერო მიმოსვლის დროს.