სულ მცირე ათი პირი ემსხვერპლა ყირიმთან გემებზე გაჩენილ ხანძარს
ყირიმთან ახლოს, ტანზანიის დროშის ქვეშ მცურავ ორ კომერციულ გემზე ხანძარი გაჩნდა, რასაც სულ მცირე ათი მეზღვაურის სიცოცხლე ემსხვერპლა - იუწყება რუსეთი. "მოხერხდა 14 ადამიანის გადარჩენა. ზღვიდან ამოტანილია ცხრა გვამი" - აცხადებს რუსეთის საზღვაო და მდინარის ტრანსპორტის ფედერალური სააგენტოს პრესმდივანი 21 იანვარს. ამავე წყაროს ცნობით, ცეცხლი მაშინ გაცნდა, როცა საწვავს ერთი გემიდან მეორეში ტვირთავდნენ შავ ზღვაში, ქერჩის სრუტის სიახლოვეს. გავრცელებული ცნობებით, ორი გემის ეკიპაჟების წევრთა საერთო რაოდენობა 31 იყო და მოიცავდა მათ შორის თურქეთის და ინდოეთის მოქალაქეებს. მიმდინარეობს დაკარგულების ძებნა. ქერჩის სრუტე, რომელიც შავ ზღვას აკავშირებს აზოვის ზღვასთან, რუსეთსა და უკრაინას შორის დაძაბულობის საგანს წარმოადგენს. ნოემბერში სრუტესთან ახლოს რუსეთის ძალებმა ცეცხლი გაუხსნეს და შემდეგ დააკავეს უკრაინის სამი ხომალდი. მოსკოვი ამბობს, რომ უკრაინის ხომალდები უკანონოდ შევიდნენ რუსეთის ტერიტორიულ წყლებში ყირიმთან ახლოს, რასაც უკრაინა უარყოფს. რუსეთმა სამი თვით გაუგრძელა პატიმრობა ინციდენტისას დაკავებულ უკრაინის 24 მეზღვაურს, რომელთა გათავისუფლების მოწოდებით რუსეთს მიმართავენ ევროკავშირი, აშშ და სხვა ქვეყნები. ყირიმის ნახევარკუნძულის ანექსირება რუსეთმა უკრაინისგან 2014 წელს მოახდინა.