«Որևէ կռիվ-ղալմաղալի, խորհրդարանական էմոցիոնալ բանավեճի մեջ պետք չէ փնտրել անձնական բաներ». Էդմոն Մարուքյան
Իրապես բուռն քաղաքական տարի ենք ունեցել: Այս մասին այսօր Ազգային ժողովում հայտարարեց «Լուսավոր Հայաստան» խմբակցության ղեկավար Էդմոն Մարուքյանը` ամփոփելով խորհրդարանական տարին և շնորհավորեց բոլորի Ամանորը և Սուրբ Ծնունդը:
«Խորհրդարանի մեկ տարին լրացել է, և կարծում եմ՝ բոլորիս վրա զգում ենք, որ պատասխանատվություն կա մեր ուսերի վրա: Իրապես որևէ քննադատության, որևէ կռիվ-ղալմաղալի, խորհրդարանական էմոցիոնալ բանավեճի մեջ պետք չէ անձնավորել և փնտրել անձնական բաներ, պետք է փնտրել միայն պետական շահին միտված փնտրտուք»,-ասաց նա և շնորհավորեց նաև զինվորների Ամանորը և Սուրբ Ծնունդը:
Արարատ Միրզոյանը նշեց, որ միանում է այդ ելույթին, սակայն ավելացրեց, որ սա վերջին նիստը չէ, և դեկտեմբերի 19-ին ևս կգումարվի արտահերթ նիստ:
Այսպիսով՝ Ազգային ժողովը քվեարկեց և 105 ձայնով միաձայն, երկրորդ ընթերցմամբ և ամբողջությամբ ընդունեց «Զորամասերի և զինվորական հաստատությունների կարգավիճակի մասին» Հայաստանի Հանրապետության օրենքում լրացումներ կատարելու մասին» և «Զինվորական ծառայության և զինծառայողի կարգավիճակի մասին» Հայաստանի Հանրապետության օրենքում լրացումներ կատարելու մասին օրենքի նախագիծը, «Հայաստանի Հանրապետության վարչատարածքային բաժանման մասին» Հայաստանի Հանրապետության օրենքում փոփոխություն կատարելու մասին օրենքի նախագիծը և «Ոստիկանության մասին» օրենքում լրացումներ և փոփոխություն կատարելու մասին օրենքի նախագիծը: