Ուկրաինայում Վիկտոր Յանուկովիչին մեղավոր են ճանաչել պետական դավաճանության գործով
Կիևի շրջանային դատարանն Ուկրաինայի նախկին նախագահ Վիկտոր Յանուկովիչին պետական դավաճանության, ինչպես նաև երկրի սահմանների փոփոխությանը և պատերազմի վարմանն օժանդակելու գործով մեղավոր է ճանաչել, գրում է meduza.io-ն:
Դատավճռում ասվում է, որ Յանուկովիչի մեղքն ապացուցված է, իսկ սահմանված պատժի մասին դեռևս չի հայտարարվել:
Մեղադրող կողմը պահանջել է Յանուկովիչին 15 տարվա ազատազրկման դատապարտել:
Դատավճիռը հեռակա է կայացվել, քանի որ նախկին նախագահը Ռուսաստանում է գտնվում: Վերջինս բազմիցս հայտարարել է, որ մեղադրանքը կեղծ է և որ գործը հարուցվել է քաղաքական դրդապատճառներով, ու ոչ մի անգամ դատավարության ժամանակ ելույթ չի ունեցել:
Հիշեցնենք, որ 2014թ.-ին իշխանափոխությունից հետո Յանուկովիչը Ռուսաստան է փախել: Նրան մեղադրում էին այն բանի համար, որ Մոսկվային խնդրել է զորք մտցնել Ուկրաինա, ինչն էլ իր հերթին հանգեցրել է Ղրիմի՝ Ռուսաստանին միանալուն: