Շատ հավանական եմ համարում, որ Երևանի ավագանու ՀՀԿ խմբակցությունը թեկնածու կառաջադրի. Դավիթ Խաժակյան
«Ելք» խմբակցությունը դեռևս Երևանի քաղաքապետի թեկնածուի հարցի վերաբերյալ որոշում չի կայացրել: «Ելք» խմբակցության ղեկավար Դավիթ Խաժակյանը Tert.am-ի հետ զրույցում ասաց, որ մինչև երկուշաբթի օրը՝ քվեարկությունը ներառյալ, ժամանակ ունեն և կարող են թեկնածու առաջադրել: Սակայն, ըստ նրա, մինչ այդ իրենք կամփոփեն և կտեղեկացնեն որոշման մասին:
«Ելք» խմբակցության ղեկավարը նշեց, որ չնայած ավագանու ՀՀԿ խմբակցության ղեկավարի հայտարարությանը, որը ներկայացվել է որպես սեփական տեսակետ, թե քիչ հավանական է համարում, որ ՀՀԿ-ն թեկնածու կառաջադրի, ինքը մտահոգություն ունի, որ ՀՀԿ-ն այդուհանդերձ թեկնածու կառաջադրի:
Նշենք, որ դեռևս քաղաքապետի թեկնածու է առաջադրել միայն Երևանի ավագանու «Երկիր Ծիրանի» խմբակցությունը: Երևանի ավագանու «Հանրապետական կուսակցություն» խմբակցության անդամ Ենոք Ազարյանը Tert.am-ի հետ զրույցում ասել էր, որ իր տեղեկություններով՝ «Հանրապետական» խմբակցությունը չի ուզում քաղաքապետի թեկնածու առաջադրել:
Նշենք նաև, որ Զարուհի Փոստանջյանի առաջադրումից բացի, եթե այլ թեկնածու չառաջադրվի, ապա ավագանին կցրվի, և կառավարությունը կնշանակի Երևան քաղաքի ավագանու արտահերթ ընտրություններ:
Հարցին, թե ինչի՞ց ելնելով ունի նման մտահոգություն, հատկապես եթե ՀՀԿ-ից պարզաբանել էին, որ եթե ՀՀԿ-ական թեկնածու պետք է առաջադրեն՝ ինչու պետք է Տարոն Մարգարյանը հրաժարական տար, Դավիթ Խաժակյանը պատասխանեց. «Ելնելով նրանից, որ հանրապետականները հուլիսի 16-ին որոշեցին ընտրություն անցկացնել՝ ի հակառակ մեր այն օբյեկտիվ որոշման, որ եթե առաջին փուլով չընտրվի քաղաքապետ, ապա արդյունավետ չի լինի ամռան ամսին՝ օգոստոսին իրականացնել քարոզարշավ, և քանի որ իրենք նման սաբոտաժ իրականացրին, ես շատ հավանական եմ համարում, որ կխորացնեն իրենց այդ մոտեցումը և կառաջադրեն թեկնածու»,-ասաց նա:
Նշենք, որ եթե վերջին պահին ՀՀԿ-ից թեկնածու առաջադրեն՝ ընտրությունները կկայանան:
Հարցին, թե հնարավոր տարբերակ համարո՞ւմ են, որ ՀՀԿ ավագանին սեփական թեկնածու առաջադրի, սակայն ընտրի Զարուհի Փոստանջյանին, Դավիթ Խաժակյանը պատասխանեց, որ այդ տարբերակին այդքան հակված չէ:
«Այսինքն՝ համարում եմ, որ ավելի պակաս հավանական է, քան, որ իրենք առաջադրեն սեփական թեկնածու և նրան ընտրեն՝ փորձելով երկարաձգել իրենց ժամկետը»,-ասաց նա:
Իսկ թե այդ դեպքում «Ելքի» քայլը որը կլինի՝ Դավիթ Խաժակյանը պատասխանեց, որ իրենք դրա մասին այսօրվա ընթացքում հայտարարություն կտարածեն՝ ամփոփելով քննարկումները և դրանից հետո կկարողանան այդ հարցին պատասխանել:
Նա նշեց, որ քննարկումները միայն խմբակցության շրջանակներում չեն արվում, այլ «Ելք» դաշինքի ձևաչափով: «Որովհետև միայն խմբակցությունը չի կարող նման որոշում կայացնել և պետք է լինի երեք կուսակցության հավասար որոշումը»,-ասաց նա: