Որքան էլ բնակարան կառուցվի, մարդը մի շաբաթ հետո սովամահ է լինելու ու այդ բնակարանը վաճառելու է. Վարդան Ղուկասյանը՝ Գյումրիի խնդիրների մասին (տեսանյութ)
Որքան էլ բնակարան կառուցվի, մարդը մի շաբաթ հետո սովամահ է լինելու ու այդ բնակարանը վաճառի: Այսօր ԱԺ-ում լրագրողների հետ զրույցում նման տեսակետ հայտնեց «Ծառուկյան» խմբակցության պատգամավոր Վարդան Ղուկասյանը՝ անդրադառնալով Գյումրիի վերակառուցմանը երկրաշարժից հետո:
Նա հիշեց, որ ԽՍՀՄ ժամանակ՝ 1926 թվականին, երբ մեծ երկրաշարժ եղավ Ալեքսանդրապոլում՝ այն ժամանակվա Լենինականում, Խորհրդային միություն առաջինն աշխատատեղեր ստեղծեց, որ գյումրեցին հնարավորություն ունենա իր ձեռքով ու հնարավորությամբ իր տունը կառուցելու:
«Վաճառելու է ու թողնի հեռանա, որը հիմա էլ տեղի է ունենում: Ցավում եմ, որ այսպես է վիճակը, սակայն ես կողմնակից եմ, որ Երևանում ոչ թե 150 մլն դոլարանոց թաղամաս կառուցեն, այլ եղածը պահպանեն, քանի որ ՀՀ-ում այդքան հուշարձան չկա, որքան Գյումրիում, որտեղ 1700 հուշարձան կա, որոնք պետք է պահպանվեն»,- ասաց նա:
Նա կողմնակից է դեպի Գյումրի ճանապարհի կառուցմանը, ինչը, ըստ նրա, կխթանի տուրիզմը: Ղուկասյանը նշեց, որ թեև ինքը մայրաքաղաք Երևանը սիրում է, միևնույն է՝ գտնում է, որ Երևանում ծախսերն ուռճացված են: Նրա խոսքով՝ իշխանությունների՝ մարզերի համաչափ զարգացման խոստումներն այսօր կյանքի չեն կոչվում:
«85 մլրդ Երևանի բյուջեն է, իսկ Գյումրիի բյուջեն 3 մլրդ է: Հավանական է՝ Հայաստանի բոլոր քաղաքներն ու գյուղերը միասին 50 մլրդ բյուջե չունեն, այսինքն՝ մենք Երևանը մեծացնում ու մեծացնում ենք, բայց ինչքա՞ն պետք է մեծացնենք: Հրեաները, որոնք բավականին խելացի ազգ են, 350 հազարանոց մայրաքաղաք են ստեղծել, մենք էլ ցանկանում ենք, որ մայրաքաղաք- հանրապետությո՞ւն լինի»,- հարցրեց Վարդան Ղուկասյանը: