Бас прокуратура Telegram пайдаланушыларына ескерту жасады
Шетелдік дереккөздердің мәліметінше, қаскөйлер қолданушыларға Telegram-ның ресми қолдау қызметінің атынан жалған хабарламалар жібереді. Хабарламада есептік жазбаны жою туралы сұраныс түскені, ал одан бас тарту үшін шұғыл түрде арнайы батырманы басу қажеттігі айтылған.
"Әдетте, алаяқтар қолданушының уақытын шектеп, жоюды тек 24 сағат ішінде тоқтатуға болатынын хабарлайды. Сонымен қатар көрсетілген мерзім өткеннен кейін аккаунт, хат-хабарлар, файлдар мен контактілер қайта қалпына келтірілмейтіндей болып жойылатынын ескертеді", - деп хабарлады Бас прокуратура.
Іс жүзінде бұл схема психологиялық қысымға негізделген: қаскөйлер қолданушының аккаунтқа қолжетімділікті жоғалтып алу қорқынышына сүйеніп, оны асықтыруға тырысады.
Батырманы басқаннан кейін қолданушы Telegram-ботқа немесе жалған сайтқа бағытталады, онда одан SMS-тен немесе мессенджер хабарламасынан келген растау кодын енгізу сұралады.
"Шын мәнінде, аккаунтты жоюдан бас тарту процедурасы мүлдем жоқ. Кодты енгізу арқылы қолданушы алаяқтарға өз есептік жазбасына кіруге өз еркімен мүмкіндік береді. Мынаны есте сақтау маңызды: Telegram-ның ресми қолдау қызметі қолданушылардан бөгде боттар немесе күдікті сілтемелер арқылы аккаунтқа кіру үшін растау кодтарын, парольдерді және өзге де деректерді сұрамайды", - деп ескертті қадағалау органы.
Аккаунтты бақылауына алған алаяқтар хат-хабарларды оқи алады, дербес деректерге қол жеткізеді, иесінің атынан хабарламалар таратады, оның контактілеріне ақша аудару туралы өтініштермен жүгінеді, сондай-ақ аккаунтты келесі алаяқтық шабуылдар үшін пайдалана алады.
Бас прокуратура алаяқтық хабарламаның негізгі белгілерін атады:
жіберуші өзін қолдау қызметі ретінде таныстырады, бірақ оның ресми расталған мәртебесі жоқ;
хабарламада сілтеме бойынша шұғыл өту немесе ботты пайдалану талабы болады;
қолданушыдан SMS-тен немесе Telegram-нан келген растау кодын енгізу сұралады;
шұғыл әрекет ету қажеттілігі мен аккаунттан айырылу қаупі туралы сезім туғызады;
жіберушінің аккаунты жақында ашылған, атын ауыстырған немесе күмәнді белгілері бар;
хабарлама мәтінінде қалыптан тыс тұжырымдар, қателер немесе күдікті сілтемелер кездеседі.
Аккаунтты қорғау үшін мыналар ұсынылады:
растау кодтары мен парольдерді ешкімге айтпау;
күдікті хабарламалардағы сілтемелерге өтпеу;
Telegram деректерін бөгде сайттар мен боттарға енгізбеу;
қосымша баптауларында екі кезеңдік аутентификацияны қосу;
"Құрылғылар" бөлімінде белсенді сеанстарды жүйелі түрде тексеріп тұру;
беймәлім немесе күдікті қосылымдарды тоқтату;
ақпаратты тек ресми баптаулар мен Telegram арналары арқылы алу.
"Алаяқтар адамның қорқынышы мен асығыстығына сенім артады. Сабыр сақтаңыз: бірнеше минуттық тексеру аккаунтты, жеке деректерді жоғалтудан және жақындарыңыз бен таныстарыңызға келуі мүмкін зияннан сақтайды", - деп толықтырды Бас прокуратура.