Ақша мен сыйлықтар уәде еткен: ҚМА Қазақстанның 14 өңірінде тергеу жүргізіп жатыр
Қаржылық мониторинг агенттігі (ҚМА) CVK қаржы пирамидасының қызметіне тосқауыл қойды. Қазіргі уақытта Агенттіктің аумақтық департаменттері еліміздің 14 өңірінде тергеу амалдарын жүргізіп жатыр, деп хабарлайды Tengrinews.kz ҚМА баспасөз қызметіне сілтеме жасап.
Жоба маркетплейс ретінде таныстырылды: қатысушыларға бекітілген кірістілігі бар әртүрлі пакеттегі инвестициялық "дүкендерді" сатып алу ұсынылған. Сауда қызметінің көрінісін жасау үшін жеке кабинетте жоқ тауарлардың орындалған тапсырыстары мен жөнелтілімдері көрсетіліп, олар үшін виртуалды пайыздар есептеліп отырған.
"Негізгі назар реферальдық жүйеге аударылған: қатысушыларға жаңа салымшыларды тартқаны үшін қатысушыларға ақшалай бонустар мен бағалы сыйлықтар уәде етілген. Агрессивті өңірлік маркетинг пен ауқымды жарнамалық науқанның нәтижесінде ұйымдастырушылар заңсыз схемаға шамамен 1,5 мың салымшыны тартқан.
Жобаны ілгерлету мақсатында жабық үгіт-насихат кештері, кеңселердің салтанатты ашылу рәсімдері және жаппай таныстырылымдар өткізілген. Аталған іс-шаралар әлеуметтік желілерде кеңінен жарияланып, халықтың сенімін қалыптастыру құралы ретінде пайдаланылған", - деп хабарлады агенттік.
Ақша қаражаты криптовалюталық платформа арқылы шығарылып, кейіннен банктік шоттарға аударылып отырған. ҚМА 474 мың доллар сомасындағы криптоактивтерге тыйым салынғанын хабарлады. Тергеу амалдары жалғасып жатыр.
ҚМА CVK қаржы пирамидасының қызметінен зардап шеккендерден тұрғылықты жері бойынша аумақтық департаменттерге хабарласуды сұрады.