Զգույշ եղե՛ք և մի՛ փորձեք մարդկանց անձնական կյանք մտնել. իմացեք, որ մի օր էլ դուք եք պատասխան տալու՝ ուր էիք գնացել, ում հետ և երբ եք խոսել. ՍԴ նախագահ Հրայր Թովմասյանը՝ իշխանություններին (տեսանյութ)
Ինձ համար կալանավորումը և այլ սցենարներ միևնույն են: Այս տաղավարից դուրս գալուց հետո ցանկացած սցենար սպասելի է ինձ համար և ես պատրաստ եմ ցանկացած սցենարի: Այս մասին «Արմնյուզ» ՀԸ «Պրեսսինգ» հաղորդման ժամանակ ասաց Սահմանադրական դատարանի նախագահ Հրայր Թովմասյանը:
«Ներքաղաքական, հասարակական դիսկուրսը շատ վատն է դարձել հիմա: Մենք չգիտենք արժանապատիվ պարտվել, մենք գիտենք նենգաբար հաղթել, բայց նենգաբար հաղթելը շատ ավելի վատ է: Քեզ կթվա, թե դու ժամանակավորապես ստացար այդ առավելությունը, հաղթեցիր, բայց պատմությունը քեզ քո տեղն է դնելու»,- ասաց նա:
ՍԴ նախագահը նշեց, որ չի ուզում հավատալ այն հրապարակումներին, որ իր դեմ արշավն անձամբ վարչապետն է ղեկավարում. «Չեմ ուզում հավատալ մամուլի հրապարակումներին, որ եղել է խորհրդակցություն, այցելել է կոնկրետ մարմիններ, բայց, ցավոք սրտի, օդում կախված է մնում այդ ամբողջը: Եվ դա հաստատվում է նաև վարչապետի խոսքերից»,- ասաց Հրայր Թովմասյանը:
Անդրադառնալով Նիկոլ Փաշինյանի հայտարարությանը, որ «թավշյա հեղափոխությունից» հետո անմիջապես չեն պահանջել իր հրաժարականը, Սահմանադրական դատարանի նախագահն ասաց. «Իրավունք ունեի՞ն պահանջելու, մենք իրավական պետությո՞ւն ենք, թե՞ քրեական ենթամշակույթին բնորոշ տարրերով ենք խոսում, «պանյատներով ենք» խոսում, որ եկել ենք իշխանության, ապեր, պետք ա գնա՞ս: Եթե խոսում ենք իրավական լեզվով, ապա որտե՞ղ էր դա գրված»:
Վարչապետի մեկ այլ հայտարարության՝ արտերկիր այցելությունների վերաբերյալ հետաքննություն իրականացնելու մասով Հրայր Թովմասյանը նշեց. «Հուսով եմ, մենք 37 թ.-ին չենք վերադարձել, երբ մարդու անձնական կյանքն էլ դարձել է հանրային իշխանությունների ուսումնասիրման առարկա: Պաշտոնական երկու այց եմ ունեցել՝ Սանկտ Պետերբուրգ և Լատվիա, իսկ թե մասնավոր ինչ այցելություններ եմ ունեցել, ապա կմեջբերեմ հետևյալը՝ անձի վերաբերյալ տեղեկությունները օրենքով չնախատեսված նպատակով հավաքելը և դրանք տարածելը... զգույշ եղեք դրա հետ կապված: Իմացեք, որ մի օր էլ դուք եք պատասխան տալու՝ ուր էիք գնացել, ում հետ էիք խոսում, որ ժամանակահատվածում եք հանդիպել և այլն: Այնպես որ զգույշ եղեք և մի փորձեք մարդկանց անձնական կյանք մտնել»: